Vraklutir frá horvna Air Asia-flogfarinum funnir

Indonesiskir myndugleikar vátta nú, at lutirnir, sum eru sæddir út fyri strondini á Borneo, eru frá horvna Air Asia-flogfarinum.

Í minsta lagi seks lík eru funnin á leiðini, stutt haðani flogfarið hvarv á radaranum sunnudagin.

Sambært myndugleikunum vóru tey deyðu ikki í bjargingarvesti, tá tey vórðu funnin. Tyrlur hjá indonesiska flogvápninum eru farin at taka líkini upp.

Bjargingarvestar, vrakpetti og fleiri lík eru funnin í einum øki einar 10 kilometrar, haðani flogfarið hvarv. 

Myndugleikarnir hava upplýst, at flogfarið helst liggur á 25-30 metra dýpi, og kavarar fara nú at leita eftir flogfarinum.

Flogfarið hvarv sunnudagin, tá tað var á veg úr Indonesia til Singapore. 162 fólk vóru við flogfarinum, av teimum vóru 155 ferðafólk.