Fyri tríggjar milliardir krónur í aldum laksi

Føroyar útfluttu aldan laks fyri okkurt um tríggjar milliardir krónur í fjør.

Hagstovan kunngjørdi í gjár nýggjastu tølini um útflutningin í fjør, men tá er desember ikki við.

Alifiskur átti næstan helvtina av útflutninginum.

Alifiskur fyri 2,7 mia. kr. varð útfluttur til 1.desember, fyri 452 milliónir krónur meira enn í 2013. Vøksturin er 20 prosent.

Til 1.desember vórðu útflutt 61.632 tons av laksi, 13 prosent meira enn í 2013.   

Útflutningurin av uppsjóvarfiski minkaði 168 milliónir krónur í fjør sammett við árið fyri.  

Færri tons, fleiri milliónir

Samanumtikið fekst meira fyri útflutta fiskin í fjør enn í 2013. Tonsini vóru 14.000 færri í fjør, men milliónirnar vóru 238 fleiri enn í 2013. 

Til 1.desember í fjør útfluttu Føroyar fyri fimm milliardir og 820 milliónir krónur, sum vóru 127 milliónir meira enn fyrstu 11 mánaðirnar í 2013.