Helst meiriluti í tinginum fyri varskógvaraskipan

Líkt er til, at løgtingið fer at biðja landsstýrið gera eina varskógvaraskipan fyri fólk, sum arbeiða hjá landi ella kommunum.

Undirtøka er eisini í samgonguni fyri uppskotinum til samtyktar hjá Kristina Háfoss í Tjóðveldi um  varskógvaraskipan.

Fíggjarnevndin hevur havt uppskotið nú í góðar tríggjar mánaðir, men sambært formanninum í nevndini, Bárði á Steig Nielsen, verður álit skrivað nú.

Og sum skilst er meiriluti í nevndini fyri at mæla løgtinginum til at samtykkja uppskotið.

Kristina Háfoss sigur, at almenn starvsfólk eiga, uttan at stúra fyri avleiðingum, at kunna boða frá møguligum óreglusemi ella lógarbrotum hjá tað almenna. 

Rættindini hjá teimum, sum varskógva, eiga at verða tryggjað í lóg. Og tað er hendan lógin, sum Tjóðveldi vil hava landsstýrið at gera í samráði við kommunurnar.