Mark sett fyri, hvussu nógv heilivágur skal kosta

Í Noreg er markið ásett at vera 800.000 kr. um árið. Kostar viðgerðin meir enn tað, verður viðgerðin ikki boðin á almennu sjúkrahúsunum í landinum.

Kostnaður, ikki dygd

Í Noreg verður heilivágurin sostatt mettur eftir hvat hann kostar, og ikki bert eftir hvussu góður hann er.

- Vit halda, at vit kunnu nýta pengarnar betri aðrastaðni í heilsuverkinum, sum gevur betri úrslit fyri somu upphædd, sigur Lars Vorland, sum er stjóri í norska ætlanarstovninum, sum tekur avgerðina.

Besti heilivágur

Norski læknin, Hans Petter Eikesdal, sigur seg vera í iva um avgerðina, tí hann ikki hevur møguleikar at veita sjúklingunum ta hjálp, sum kann hjálpa teimum.

Sjálvur heldur hann, at sjúklingar eiga at fáa besta heilivágin sum finst, men politiskur áhugi er ikki fyri tí, staðfestir Hans Petter Eikesdal.

Heilivágur vorðin dýrari

Í Danmark eru útreiðslurnar til heilivág, sum sjúkrahúsini lata, hækkaðar 2, milliardir kr. síðani í 2007. Tað leggur trýst á sjúkrahúsini, og fleiri serfrøðingar ávara ímóti sparingunum sum vera settar í verk.

Samstundis sigur varastjórin á sjúkrahúsinum í Herlev, Steen Werner Hansen, seg sakna politiska avgerð, sum kann steðga skjótt hækkandi prísunum.