NEAFC herðir eftirlit

Í næstan tíggju ár hava londini í fiskivinnusamstarvinum í landnyrðingsatlantshavi, NEAFC, kravt váttan fyri, at fiskurin er fiskaður lógliga, tá skip eru komin inn við frystum fiski.

Í gjár herdi NEAFC hetta eftirlitið, so tað nú eisini er galdandi fyri feskan fisk og feskar fiskavørur.

Sama skipan fyri feskan fisk

Fyri at forða fyri ólógligum og óskipaðum fiskiskapi hevur NEAFC í skjótt tíggju ár kravt prógv frá myndugleikunum í landinum, har sum skipið er skrásett, fyri, at skipið er lógliga skrásett og hevur kvotu.

Harafturat metir havnarmyndugleikin har, sum skipini koma við fiskinum, um alt er í lagi. Hetta hevur, sambært NEAFC, givið sera góð úrslit í stríðnum móti ránsveiðu.

Í gjár kom í gildi sama skipan fyri feskan fisk. Í NEAFC eru londini í ES - Danmark er við fyri Føroyar og Grønland - Ísland, Noreg og Russland.