Skulu gera politikk fyri skapandi vinnu í Føroyum

Landsstýrið hevur sett ein arbeiðsbólk at gera uppskot um politikkin og eina heildarætlan við átøkum, sum geva skapandi vinnuni í Føroyum umstøður at mennast og vaksa.

Í arbeiðsbólkinum eru Oyvindur av Skarði úr Vinnumálaráðnum, Alda Joensen úr Mentamálaráðnum, Johannes Pauli Poulsen úr Fíggjarmálaráðnum og Elisabeth Fransiska Rasmussen av Løgmansskrivstovuni.

Tilfar um arbeiðið verður savnað á heimasíðuni hjá Vinnumálaráðnum.

Skapandi vinna hevur mentanarligt og skapandi grundarlag. Rávøran hjá skapandi vinnu er eginleikin at hugsa, skapa og endurnýggja, sigur landsstýrið í tíðindaskrivi.

Arbeiðsbólkurin fer at kanna millum annað, hvussu stórur partur, skapandi vinna er í føroyska búskapinum, og hvussu skapandi vinna kann vera grundarlag fyri trivnaði og fólkavøkstri í Føroyum.

Bólkurin heitir á øll áhugað um at koma við uppskotum, sum bólkurin kann taka við í sítt arbeiði.