Grundgeving at nokta fylgjara skal vera skrivlig

Landssjúkrahúsið kann ikki uttan nakra grundgeving nokta sjúklingum at hava onkran við sær, tá tey noyðast av landinum til viðgerðar.

Løgtingsins umboðsmaður hevur biðið Landssjúkrahúsið broyta siðvenju og geva sjúklingum, sum ikki fáa nakran at fylgjast við sær av landinum, skrivliga grundgeving fyri at nokta.

- Eg haldi, at tað er sera átaluvert, at Landssjúkrahúsið, hóast fleiri áheitanir frá Føroya Kærustovni, ikki hevur gjørt nakra roynd at bøta um hesi viðurskifti, sigur Sólja í Ólavsstovu, Løgtingsins umboðsmaður. 

Sambært Heilsumálaráðnum er siðvenjan hjá Landssjúkrahúsinum at geva munnliga grundgeving og bara skrivliga, tá biðið er um tað.

Kærustovnurin sigur, at hann ofta hevur gjørt Landssjúkrahúsið vart við, at tað er óheppið fyri kæruviðgerðina, at avgerðirnar eru munnligar, tí tað seinkar viðgerðini.