Skulu lúka krøvini

Norðurlandaráðið fer seinni í mánaðinum at gera eina roynd at steðga læknum og øðrum heilsustarvsfólkum, sum ikki liva upp til krøvini, at flyta runt í norðurlondum og arbeiða, hvørja ferð klagur koma og myndugleikar byrja at spyrja. 

Málið kemur fyri á Norðurlandaráðsfundi í Reykjavík seinni í mánaðinum. Hetta er ikki fyrstu ferð at hetta málið er uppi at venda. 
Málið hevur verið á dagsskránni í norðurlandaráðshøpi seinastu fimm árini, men á fundinum í Reykjavík seinni í mánaðnum er málið ovast á dagsskránni. 

Trupulleiki kendur í Føroyum

Trupulleikin er ikki ókendur í Føroyum. Fyrr í ár kom undan kavi, at belgiski sálarlæknin Piet Cassier hevði arbeitt á psykiatrisku deild á landssjúkrahúsinum, hóast heilsustýrið kannaði hann og hóast hann ikki hevði loyvi at skriva serlæknaváttanir. Hann var burturvístur, tá tað kom undan kavi. 

Heilsumálaráðharrarnir í Norðurlondum meintu í fjør ikki, at ein felags norðurlendsk skipan er rætti vegurin at fara, hóast Norðurlandaráðið mælti til tað. í ár hevur Norðurlandaráðið enn einaferð mælt til eina felags norðurlendska skipan og tí er ávísur spenningur um, hvat svarið verður.