Vil hava hægri inngjald til Heilsutrygd

Løgtingið samtykti í vár at hækka fasta gjaldið til Heilsutrygd 10 krónur, upp í 170 krónur, men síðani at lækka gjaldið niður í 165 krónur 1. januar.

Nú skjýtur Sirið Stenberg, landsstýriskvinna í heilsumálum, upp seta ætlaðu lækkingina úr gildi, men í staðin at hækka gjaldið upp í 175 krónur 1. januar.

Tað verður mett at geva Heilsutrygd 4,3 milliónir kr. í meirinntøku. Inntøkugrundaða gjaldið verður framvegis 0,6 prosent.

Tilskotsskipanin verður broytt

Haraftrat verður tilskotsskipanin broytt, soleiðis at borgarar, sum hava tørv á øðrum enn heilivági, sum ikki fær tilskot - t.d. kostískoyti og vørur, sum apotekini selja í vanligari sølu - skulu nú søkja Tilskotsnevnina um fíggjarligt ískoyti.

Sum er verða ískoyti til slíkar vørur veitt eftir ávísing frá lækna. Nú verður torførari at fáa tilskot til vørur, ið ikki beinleiðis verða nýttar til viðgerð, tí útreiðslurnar eru vaksnar munandi, verður sagt í viðmerkingunum til uppskotið.

Broytingin hevur við sær, at útreiðslurnar til heilsutrygdarveitingar lækka umleið 1,4 milliónir kr. Bæði Tilskotsnevndin og Heilsutrygd hava mælt til at gera hesar broytingarnar.