Finst hvassliga at nýggjum fjallalista

Umhvørvisstovan hevur gjørt ein lista við tignarligum fjallatindum út frá fýra treytum. Millum annað skal ein fjallatindur vera minst 50 metrar hægri enn hálsurin ella skarðið upp til hægra fjallið, vera yvir 100 metrar høgur, liggja á einari oyggj og ikki á hólmi, og stakkar og drangar telja ikki við.

Úrslitið er ein listi við 209 tignarligum fjallatindum. Í mun til gamla fjallalistan, so eru 135 fjøll strikað, meðan fýra nýggj eru løgd afturat: Hvannagjógvartindur í Viðoy, Rivsrøkur í Streymoy, Lisshøvdi á Borðoynni og Borgarheyggjur í Vágum.

Pól Sundskarð, fjallakønur, heldur tó, at ein frymil einsamallur ikki kann avgera, hvørjir tindar eru tignarligir ella ikki.

– Við hesum frymlinum rakar tú ofta ein slætta í staðin fyri ein tind, og staðarnøvn kunnu eisini verða flutt. Tað ber ikki til, sigur hann.

Hann hevur vent sær til Umhvørvisstovuna og mælt til, at listin verður tikin niður, til hann kann endurskoðast í samstarvi við fólk, sum kenna føroysku fjøllini.

Kringvarpið royndi eisini at fáa eina viðmerking frá Umhvørvisstovuni, men tað eydnaðist ikki í dag.