100.000 fólk í Sri Lanka byrja nýggja tilveru

Seks ár eftir at borgarakríggið í Sri Lanka endaði, hevur forsetin boðað frá, at 100.000 fólk sum framvegis búgva í legum, skulu fáa ein jarðarteig. Tað skal gerast áðrenn seks mánaðir eru farnir, sigur Sirisena, forseti.

- Eg veit at talan er um eitt stórt mál at seta sær, men eg ætli at fullføra tað, so fólk sum einki hava, kunnu byrja eina nýggja tilveru, sigur hann.

Borgarakríggið í Sri Lanka, ímillum tamilsku tikararnar og stjórnarherin byrjaði í 1983, og endaði ikki fyrr enn stjórnarherurin vann stríðið í 2009.

Í eini frágreiðing, sum ST almannakunngjørdi í fjør, framdu báðir partar í stríðnum kríksbrotsverk, og ST hevur heitt á myndugleikarnar í Sri Lanka um at fáa sett ein serligan dómstól, við altjóða dókarum, sum skulu avhoyra fólk sum eru undir illgruna fyri kríksbrotsverk.

Serliga ógvuslig vóru kríksbrotsverkini ta seinastu tíðina av borgarakrígnum, sigur ST.

Tamilarnir eru umleið 15 prosent av fólkinum í Sri Lanka, meðan singalesarar eru 75 prosent. Tamilar eru í meiriluta á norðara partinum av oynni.

Í 1972 kravdu tamilarnir sjálvstýri, og tá tað ikki bar til, var felagskapurin, LTTE, stovnaður í 1976. Stríðið harðnaði til 1983, tá veruligt borgarakríggj brast á. Kríggið kravdi umleið 100.000 mannalív.

Í 2002 varð ein vápnahvíld fingin í lag, sum Noreg slóðaði fyri, men longu árið eftir boðaðu tamilsku tikararnir frá, at vápnahvíldin ikki var galdandi longur.

Í 2008 boðaði stjórnin frá tí sama, og setti sær fyri at gera enda á borgarakrígnum. Tað hevði ógvusligt kríggj við sær til í mai í 2009, tá tamilsku tikararnir máttu leggja vápnini. Stríðið seinasta árið kostaði minst 40.000 mannalív, upplýsir ST.