Islamiskur Statur váttar: »Jihadi John« er deyður

Felagsskapurin ISIL sigur, at høvuðsbøðilin hjá teimum, bretski ríkisborgarin, Jihadi John, læt lív í loftálopi í Sýria í november í fjør

Jihadi John, ið skar fleiri bretskar, amerikanskar og japanskar gíslar á háls, doyði í einum loftálopi í Sýria í november, váttar felagsskapurin ISIL

Mynd: Savnsmynd/AP

Sigrún H. Brend

Bjarni Mohr

20.01.2016 - 08:59

Tað skrivar AFP-tíðindastovan. Miðskeiðis í november í fjør kom fram, at amerikanarar møguliga høvdu dripið Jihad John í einum dronuálopi í sýriska býnum, Raqqa, har ISIL hevur høvuðsstøð.

Tað er tó nústani, at ISIL-felagsskapurin sjálvur váttar, at bøðilin hevur latið lív. Jihadi John hevur við knívi skorið fleiri bretskar, amerikanskar og japanskar gíslar í Sýria á háls.

Avrættingarnar vórðu tiknar upp á sjónband og lagdar á internetið. Veruliga navnið hjá Jihadi John var Mohammed Emwazi.

SÍ EISINI Navn sett á hann: »Jihadi John« avdúkaður

Allur heimurin lærdi hann at kenna undir navninum Jihadi John, sum avrættaði gíslar hjá Islamskum Stati á sjónbandi.

Mohammed Emwazi varð føddur fyri 27 árum síðani í Kuveit og flutti við familju síni til Vesturlondon, tá hann var seks ára gamal.

Sambært rættarskjølum var Jihandi John knýttur at víðgongda netverkinum, The London Boys, sum al-Sha-baab vandi.