Gekk skjótt at fáa roknskapin lidnan

Roknskapirnar hjá feløgunum fyri 2015 vóru lidnir 7. januar, grannskoðaðir og samtyktir á eykaaðalfundum longu 11. januar 2016. Men tað var ikki uttan grund.

Tí nótaskipið Asbjørn Senior skuldi hava veiðiloyvið hjá Ocean Group Faroes aftur. Tað fekk skipið frá Fiskimálaráðnum 14. januar.

SÍ EISINI Ocean Group Faroes er kolldømt

Í fyrsta umfari vildi Fiskimálaráðið tó ikki, tí sambært ráðnum var útlendski eigaraskapurin ov stórur.

Men í skrivi til Ocean Group Faroes 14. januar skrivar Fiskimálaráðið, at sambært roknskapunum fyri 2015 eru eigaraviðurskiftini í samsvari við lógina um vinnuligan fiskiskap. Tí fær Asbjørn Senior veiðiloyvið.

Eingin avtala um ábyrgdarlán

Fiskimálaráðið hevur fingið skuldarbrøvini frá feløgunum í Vági. Sambært teimum hava lánveitarin, Asbjørn Aps, og feløgini Ocean Group Faroes og Baglhólmur onga avtalu um ábyrgdarlán.

Eingi ábyrgdarlán eru í feløgunum. Í upprunaligu roknskapunum fyri 2014 vóru lánini annars ábyrgdarlán. Og tí fekk Asbjørn Senior ikki loyvið tá.

Tað var, sum skilst, eitt mistak í ársfrásøgnunum, sum so vórðu rættaðar í desember. Talan er, og var, sambært feløgunum í Vági um vanlig veðlán.