Vilja hava fyritøkur at seta fleiri lærlingar

Endamálið við uppskotinum er at fáa fyritøkur at seta fleiri lærlingar. Sambandsflokkurin sigur, at hóast tilgongdin av lærlingum er vaksin síðani fíggjarkreppuna, átti hon at verið størri.

Tað vísir seg, at tá tilgongdin av lærlingum minkar í ringum tíðum, veksur hon ikki so nógv aftur, tá tíðirnar batna, og virksemið er størri.

Sambandsflokkurin vísir á, at teknisku skúlarnir og yrkisskúlarnirkring landið verða bygdir út, og samstundis hava bæði landið, kommunur og privata vinnan stórt byggivirksemi.

Landið endurrindar í løtuni 75 prosent

Men bøttar umstøður í teknisku skúlunum og yrkisskúlunum og økta virksemið í landinum eru eftir øllum at døma ikki nóg mikið at fáa fleiri lærlingar, og tí er neyðugt við øðrum politiskum átøkum, heldur Sambandsflokkurin.

Sum er endurrindar landið 75 prosent av lærlingalønini, og á fíggjarlógini í ár verður roknað, at endurgjaldið fer at kosta 14 milliónir kr. Tá er lærlingatalið umleið 300 um árið.

Eftir uppskotinum hjá Sambandsflokkinum skal landið endurrinda 100 prosent fyri lærusáttmálar, sum verða gjørdir frá 1. apríl í ár til nýggjársaftan í 2020.