Latið ikki ótta og svartskygni sigra

Frans pávi fanst í páskaboðskapi sínum at teimum, ið ikki vilja hjálpa flóttafólki.

Frans pávi segði í boðskapi sínum til mannfjøldina á Pæturstorginum í Rom í dag, at flóttafólk verða víst burtur, ið áttu at verið boðin vælkomin og fingið hjálp.

- Páskaboðskapurin um upprisna Kristus minnir okkum á hvørki at gloyma tey, ið leita eftir eini betri framtíð, ella tey, ið flýggja undan kríggi, hungri, fátækdømi og órætti, segði Frans pávi.

Nógv hava avlýst ferðina til Rom á páskum

Í páskaprædiku síni í gjárkvøldið hevði pávin yvirgangin í Evropa í huga og heitti á tey kristnu um ikki at lata seg binda niður av ótta og svartskygni.

Fríggjadagin fordømdi pávin yvirgangsatsóknirnar í Brússel.

Nógvir útlendskir katolikkar hava avlýst ferðina til Rom á páskum eftir yvirgangsatsóknirnar í Brússel, men Pæturskirkjan var tó stúgvandi full, tá pávin helt messu í gjárkvøldið.