Høgni Hoydal ásett norðhavssildakvotuna fyri 2016

Høgni Hoydal, landsstýrismaður í fiskivinnumálum, hevur eftir ráðførslu við Løgtingsins Uttanlandsnevnd, ásett føroysku norðhavssildakvotuna fyri 2016.

Nú semja ikki varð gjørd millum strandarlondini á heysti í 2015 um býtið av norðhavssild fyri í ár og næstu árini, hava londini hvørt sær ásett kvotur fyri 2016, skrivar Fiskimálaráðið á heimasíðu síni.

Avgerð er tikin um, at føroyska kvotan fyri norðhavssild í ár verður 56.087 tons.

Sambært fiskirættindasáttmálum við ávikavist Russland og Grønland lata Føroyar hesum londum 12.500 tons av føroysku norðhavssildakvotuni.

Hjá føroyskum skipum verða sostatt 43.587 tons at fiska í 2016.

Kunngerð um norðhavssildafiskiskapin verður lýst í næstum.