Upplýsingar um sjúklingar kunnu hvørva

Vandi er fyri, at upplýsingar hjá føroyskum sjúklingum, sum fáa viðgerð í Danmark, detta niðurímillum, tí føroyingar og danir hava hvør sína skipan við p-tølum..

Tað stendur í einum yvirliti yvir forðingar, ið eru millum Føroyar, Grønland og Danmark, sum danska sosial- og innlendismálaráðið hevur gjørt.

Tá føroyskir sjúklingar fara niður at fáa viðgerð, fáa teir eitt sonevnt "erstatsningpersónsnummar," tí teir ikki hava danskt p-tal.

Upplýsingar kunnu fara fyri skjeytið

Tá føroysku sjúklinganir verða útskrivaðir, fara útskrivingarbræv og upplýsingar um heiligvág ikki av sær sjálvum til talgildu føroysku journalskipanina, tí henda ikki kann taka ímóti upplýsingum, tá persónummarið er ókent.

Tí er vandi fyri, at upplýsingar detta niðurímillum, tá sjúklingurin verður útskrivaður, og tað kann hava týdning fyri tryggleikan hjá sjúklinginum, tí læknar hava ikki sjálvvirkandi atgongd til eyka upplýsingar um laboratoriukanningar.

Tá sjúklingarnir so aftur verða innlagdir í Danmark, fáa teir eitt nýtt nummar, og tí eru allar journalupplýsingar ikki neyðturvuliga tøkar. Tá er aftur vandi fyri, at upplýsingar fara fyri skjeytið.

Tí er eisini vandi fyri, at sjúklingurin hevur fleiri journalir, stendur í yvirlitinum. Grønlendskir sjúklingar hava ikki trupulleikan, tí teir hava danskt CPR-tal.