Hann vil hava gjald á tunlarnar

Stjórin á Landsverki, Ewald Kjølbro, skjýtur upp, at gjald verður lagt á allar tunlarnar, ið skal fíggja viðlíkahald av undirstøðukervinum, tað eru vegum, brúm og tunlum.

Ewald Kjølbro sigur, at játtanin á fíggjarlógini til viðlíkahald røkkur als ikki, og samlaða eftirsleipið er 375 milliónir krónur.

Tunlarnir væl dýrari at reka enn vegirnir

375 milliónir er hálva níggjundu ferð rakstrarjáttanina, og vit hava upp í sjey ferðir størri eftirsleip enn londini, vit samanbera okkum við.

Ewald Kjølbro sigur í ársfrágreiðingini hjá Landsverki, at tunlar eru í minsta lagi tríggjar ferðir so dýrir at reka sum vanligir vegir.

Varð gjald lagt á allar tunlarnar, og ikki bara undirsjóvartunlarnar, kundi tað verið munandi lægri, enn gjaldið er fyri at koyra í Vágatunlinum og Norðoyatunlinum nú, tí tá høvdu nógv fleiri brúkarar goldið.

Landsverk fær 43 milliónir til viðlíkahald

Ein annar møguleiki er at nýta ein part av skrásetingargjaldinum, vektgjaldinum, mvg og avgjøldum á brennievni til viðlíkahald. Henda upphæddin er 360 milliónir kr. í ár.

Til samanberingar fær Landsverk í ár 43 milliónir at halda vegir, tunlar og brýr fyri. Av hesum fara 10 milliónir til vetrarhald.

Sostatt fara bara 12 prosent av inntøkunum frá bileigarum til at halda undirstøðukervið viðlíka, verður sagt í ársfrágreiðingini hjá Landsverki.