Google kemur nú at hjálpa henni

Teldufyritøkan Google fer nú at hjálpa við at avmynda Føroyar eftir mongu áheitaninar, fyritøkan fekk eftir ein vælumtóktan stuttfilm á seyðabaki

Google tekur nú, í samstarvi við Visit Faroe Islands og Atlantic Airways, tráðin upp eftir upptøkunum, ið vórðu gjørdar til vælumtókta Sheep View-stuttfilmin

Mynd: Skíggjamynd/Visit Faroe Islands á YouTube

Bjarni Mohr

31.08.2016 - 14:59

Google hevur tikið mongu áheitaninar til sín. Fyritøkan fer nú at hjálpa við at avmynda Føroyar, so fólk uttanlands kunnu uppliva landið við telduna.

- Nú er tað upp til Føroya fólk og ferðafólk í Føroyum at gera eina serliga føroyska útgávu av Street View, sigur Visit Faroe Islands í tíðindaskrivi.

Google tekur nú í samstarvi við Visit Faroe Islands og Atlantic Airways tráðin upp eftir upptøkunum, ið vórðu gjørdar til vælumtókta Sheep View-stuttfilmin.

Greinin heldur fram niðanfyri

Upptøkurnar skulu gerast við at brúka seyð, súkklur, ryggsekkir, bilar, kajakkir, bátar, tyrlur og kavaraútgerð, upplýsir Visit Faroe Islands í tíðindaskrivinum.

Myndir á almennum vegum í Føroyum byrja 7. september og verða gjørdar til síðst í oktober 2016. Nakrar fáar upptøkur verða gjørdar á nøkrum fáum gongugøtum í vár.