Tjóðbankin: Uppsjóvarvinnan fíggjar seg sjálva

Fiskivinnan, sum plagdi at læna nógvar pengar í bankunum, og í krepputíðum hevði við sær, at peningastovnarnir mistu nógvan pening, hevur ikki ofta ørindi í bankanum longur.

Uppsjóvarvinnan og alivinnan í Føroyum hava so stór avlop, at flestu íløgurnar kunnu fíggjast innanhýsis í fyritøkunum, ella kann avdrátturin gjaldast eftir stuttari tíð.

Tað sigur danski tjóðbankin í nýggjastu frágreiðing síni. 

Er neyðugt at gera stórar íløgur í alivinnuni, verða lán tikin í útlendskum bankum.

Húsarhald eiga 10 mia. kr.

Húsarhald hava umleið 10 milliardir krónur í innláni í føroysku peningastovnunum, tað eru 20 prosent meira enn fyri trimum árum síðani. 

Samstundis eru útlánini til hús og íbúðir hækkað umleið fimm prosent, tí serliga húsaprísinir í Havn eru hækkaðir umleið átta prosent. 

Sostatt nærkast húsaprísurin í Havn tí, sum hann var í 2008, stendur í frágreiðingini hjá Tjóðbankanum. 

Rentan er lág, og umsetningurin á húsa- og íbúðarmarknaðinum er vaksin meira enn 25 prosent um árið.

Sagt verður, at føroyingar yvirhøvur gjalda lán sín skjótari aftur enn danir.