Tingmaður: Hjúnabandslógin aftur í tingið

Jógvan á Lakjuni í Fólkaflokkinum fer at seta Akseli V. Johannesen, løgmanni, ein munnligan fyrispurning í Løgtinginum í dag.

Jógvan á Lakjuni hevur fingið innlit í málið um hjúnabandslógina. Sambært tí hava løgfrøðingar í Danmark fleiri viðmerkingar og broytingaruppskot til tað, tingið samtykti í vár.

SÍ EISINI DV kjak: Uppskotið um at broyta hjúnabandslógina

Hetta eru viðurskifti og avleiðingar av uppskotinum, sum ikki vórðu umrødd, tá málið varð samtykt í tinginum, sigur Jógvan á Lakjuni í viðmerkingunum til uppskotið.

Tí er neyðugt at koma aftur í tingið við málinum, men úr Føroyum er komin boð um, at málið skal ikki leggjast aftur fyri tingið, sigur Jógvan á Lakjuni.

Viðgjørt í tinginum klokkan 11

Jógvan á Lakjuni sigur eisini, at í fundarfrásagnum á Løgmansskrivstovuni og í Heilsu- og innlendismálaráðnum stendur, at løgmaður møguliga skal tosa við Lars Løkke Rasmussen, forsætisráðharra, um málið. Hann spyr Aksel V. Johannesen, hvør tað er, sum ikki vil hava málið aftur fyri tingið.

Jógvan á Lakjuni spyr eisini, um tað ikki er andsøgn í, at málið er so hápolitiskt, at løgmaður má viðgera tað við forsætisráðharran, samstundis sum tað er so lítið, at ætlanin er at skerja málið lógartekniskt.

Tað skal gerast til tess at tryggja, at tað ikki kemur aftur í tingið. Munnligir fyrispurningar vera á tingfundinum, sum byrjar klokkan 11.