Ikki undirtøka fyri hitaloysn

Teimum varð álagt at finna eina semju. Tað gjørdu partarnar, men teir taka ikki undir við semjuni. Tað siga Bárður á Steig Nielsen, Jacob Vestergaard og Bill Justinussen, sum umboða andstøðuna í fíggjarnevndini.

Teir taka ikki undir við at uppskotinum frá Rigmor Dam, landsstýriskvinnu, um at broyta lógina um Marknagilsdepilin, og mæla tinginum frá at samtykkja broytingina.

Mett at kosta 13,4 mió.

Sambært upprunaliga uppskotinum frá landsstýriskvinnuni skuldi Glasir hitast við jarðhita, og tað varð mett at kosta 13,4 milliónir krónur.

Rigmor Dam, landsstýriskvinna í mentamálum, bað tí tingið um at hækka upphæddina í verklagslógini fyri Glasir úr 515 milliónum upp í 528,4 milliónir kr.

Tá uppskotið hevði fingið fyrstu viðgerð í tinginum og var farið í fíggjarnevndina, kom fram, at Fjarhitafelagið eisini segði seg kunna veita eina umhvørvisliga orkuloysn.

SÍ EISINI Arbeiða víðari við orkuloysn

Rigmor Dam bað síðani partarnar um semjast, og tað endaði við, at Glasir bæði skal hitast við jarðhita og fjarhita. Henda loysnin verður mett at kosta átta milliónir krónur og ikki 13,4 milliónir, sum Rigmor Dam bað tingið um.

Samgonguumboðini í fíggjarnevndini, Ruth Vang, Helena Dam á Neystabø, Kristin Michelsen og Pauli Trond Petersen, taka undir við broytingini.

Tey mæla til, at upphæddin í verklagslógini 523 milliónir krónur, 5,4 milliónir minni enn upprunaliga uppskotið. Fíggjarnevndin hevur lagt álit fram, og tingið fer at atkvøða í málinum í næstu viku.