Óvist hvussu nógv landið missir

Ikki ber til at siga, hvussu nógv meirvirðisgjald, danski skatskassin fær, tá fólk í Føroyum keypa til dømis hald hjá Netflix, HBO, Apple TV ella Spotify, tí haldið verður skrásett sum danskt hald.

Meirvirðisgjaldið av haldaragjaldinum fer tá í statskassan, hóast tað er goldið í Føroyum. Karsten Lauritzen, skattamálaráðharri, hevur svarað Sjúrði Skaale, fólkatingsmanni.

SÍ EISINI Føroyskt mvg endar í danska statskassanum

Sjúrður Skaale spurdi, hvussu nógv meirvirðisgjald, statskassin fær av elektroniskum vørum og tænastum, sum fólk í Føroyum keypa úr londum uttan fyri ES.

Karsten Lauritzen, ráðharri, sigur, at hann hevur fingið at vita frá danska skattavaldinum, at ikki ber til at nevna nakað tal fyri Føroyar burturav.

Trupult at koma svarinum nærri

Tey, sum selja slíkar tænastur til Føroya, gera ikki altíð mun á Føroyum og Danmark.

Tey, sum búgva í Føroyum, kunnu verða skrásett at búgva í Danmark. Tí koma tey undir meirviðisgjaldið, sum verður kravt og avroknað í Danmark. 

Ikki ber til at skilja tað, sum fólk í Føroyum hava keypt, burturúr, skilst á svarinum frá danska ráðharranum í skattamálum.