Kanna hví læknavaktin ikki svaraði

Heilsutrygd er farin at kanna, hvussu tað bar til, at Jens Mortan Rasmussen ikki fekk læknavaktina á Landssjúkrahúsinum at svara, hóast hann ringdi til nummar 1870 í næstan ein tíma. 

Tað sigur John D. Olsen, fulltrúi á Heilsutrygd, sum umsitur kommunulæknaskipanina og sostatt eisini læknavaktina á Landssjúkrahúsinum.

Fyrsta fráboðanin um trupulleika

Verandi telefonskipanin hjá læknavaktini varð sett í verk fyri einum ári síðani, og hetta er fyrstu ferð, at Heilsutrygd hevur fingið boð um, at fólk eru tveitt aftur og fram í skipanini, uttan at nakar tekur telefonina.

John D. Olsen vildi ikki gera samrøðu um málið hósdagin, tí hann hevur ikki havt møguleikar til at kanna viðurskiftini, sum Jens Mortan Rasmussen nevndi. Men tað ætlar hann at gera í dag.

Jens Mortan Rasmussen kom í eina trupla støðu, tá mamma hansara datt og meiddi seg, tá tey vórðu og hugdu at jólabýnum í Æðuvík.

SÍ EISINI Ringdi 1870: Læknavaktin í Havn svaraði ikki

Jens Mortan Rasmussen ringdi til læknavaktina á Landssjúkrahúsinum, men eingin svaraði telefonini, segði hann við útvarpið í gjár.

Ístaðin fyri at halda leiðina fram til Havnar, tá hann kortini ikki fekk fatur á læknavaktini, gjørdi Jens Mortan Rasmussen av at koyra til Klaksvíkar Sjúkrahús ístaðin, og tað var ein røtt avgerð, sigur hann.

Heilsutrygd hevur lovað útvarpinum, at tey fara at gera viðmerkingar til málið í dag, fríggjadag, tá málið er kannað.