Mæla frá at linka krøvini til læknaváttanir

Ætlanin er at fáa Løgtingið at linka kravið um læknaváttan, tá fólk eru sjúk. Læknaváttan skal ikki krevjast fyrstu vikuna. 

Hesum mælir Arbeiðsgevarafelagið staðiliga frá. Sambært viðmerkingunum um lógarbroytingina eru avleiðingarnar fyri vinnuna lítlar ella ongar.

Tað heldur Arbeiðsgevarafelagið vera at gera alt ov nógv av. Felagið sigur, at ikki verður nevnt eitt orð um eyka útreiðslur hjá arbeiðsgevarum, um kravið um læknaváttan fyrstu vikuna verður strikað.

Fer at kosta arbeiðsgevarum meira

Talan er, sambært uppskotinum, um “bagatellmark.” Í okkara eygum, siga arbeiðsgevararnir í hoyringarsvarinum, er tað beinleiðis forhánisligt at kalla hetta bagatell. 

Tað er lítið at ivast í, at linari krav um læknaváttan fer at økja fráboðanirnar til dagpengaskipanina. Og tað fer at hava við sær størri útreiðslur hjá arbeiðsgevarum.

Føroya arbeiðsgevarafelag sigur, at tað eigur altíð at vera krav fyri at fáa dagpening, at lækni hevur váttað, at umsøkjarin er sjúkur. Arbeiðsgevarar rinda fólki dagpeningin fyrsta og annan dagin, tey eru sjúk.