Tepurt yvirskot í 2016

Bústaðir høvdu yvirskot í fjør, hóast tað ikki var stórt, 222.000 krónur. Men úrslitið er kortini 4,4 milliónir krónur størri enn í 2015, tá Bústaðir høvdu 4,2 milliónir krónur í halli.

Í fjør gjørdist úrslitið betri, tí Bústaðir høvdu størri inntøkur av virðisbrøvum og leigu. Inntøkurnar vóru 2,2 milliónir størri í fjør enn í 2015.  

Bústaðir eru í ferð við at leggja um virksemið frá at vera ein útlánsstovnur til at verða eitt bústaðafelag, sum skal útvega, umsita og reka leigubústaðir um alt landið. 

Útlánini minkaðu góðar 30 milliónir í fjør. Bústaðir brúktu góðar 43 milliónir krónur til grundøki og bygningar í 2016. Í løtuni umsitur Bústaðir 181 leigumál. 95 bústaðir eru í gerð, og 200 aðrir eru ávegis.