Grønlendingar fáa eingi sjókort

Danskir myndugleikar klára ikki at halda sítt egna lyfti til grønlendingar um at gera nýggj, talgild sjókort.

Fyri átta árum síðani lovaði danska stjórnin, at stovnurin Geo'data'styrelsen skuldi gera 73 nýggj sjókort, og at tey skulu vera liðug, áðrenn 2018 er runnið.

Men higartil eru bara 32 av teimum 73 sjókortunum gjørd, og arbeiðið er nú fullkomiliga steðgað upp, skrivar Politiken.

Sambært blaðnum er orsøkin, at danska stjórnin hevur flutt Geo'data'styrelsen úr Keypmannahavn til Aalborg, og bara eitt av teimum 15 starvsfólkunum, sum burturav arbeiddu við at gera grønlendsku sjókortini, hevði hug at flyta við stovninum til Aalborg.

Førleikin burtur

Sambært Geo'data'styrelsen eru førleikarnir at gera hesi kortini nú burtur, og hóast stovnurin roynir at seta nýggj fólk við, so tekur tað drúgva tíð, helst fleiri ár. Tí verða eingi sjókort gjørd fyribils.

Málið vekir ans, bæði millum grønlendskar og danskar politikarar. Sjókortini hava týdning, tí uttan tey sigla skip at kalla í blindum.

- Eg havi fyrr víst á, at hetta kann í síðsta enda kosta mannalív, sigur Aaja Chemnitz Larsen, fólkatingslimur fyri Inuit Ataqatigiit, við Politiken.

Andstøðan: Hetta er ein gøla

Andstøðan í danska fólkatinginum sigur, at málið um grønlendsku sjókortini er ein gølu, og danski Javnaðarflokkurin og Eindarlistin krevja stjórnina eftir eini frágreiðing.

Danski veðurlags- og orkumálaráðharrin, Lars Christian Lilleholt, harmast støðuna.

- Sjókortini verða seinkað, og tað harmist eg um. Enn er ov tíðliga at siga, nær kortini verða liðug, sigur hann við Politiken.