Landsverk: Sjúkrahúsini hava tørv á dagføringum fyri eina milliard krónur

Okkurt um ein milliard krónur fer tað at kosta at dagføra tey trý sjúkrahúsini í Sjúkrahúsverkinum, og góðar 18 milliónir krónur skulu brúkast um árið til at halda sjúkrahúsini við líka næstu 15 árini. 

Tað vísir ein støðulýsing hjá Landsverki av Landssjúkrahúsinum, Klaksvíkar sjúkrahúsi og Suðuroyar sjúkrahúsi, sum mælir at játta pening til dagføringar og árligt viðlíkahald.

Flestu bygningarnir undir sjúkrahúsverkinum eru gamlir. 

Á Landssjúkrahúsinum er meirilutin av bygningunum meira enn 50 ára gamlir, vísir frágreiðingin hjá Landsverki.

87 mió. kr. um árið

Landsverk og sjúkrahúsverkið mæla tí til at játta 87 milliónir krónur um árið til viðlíkahald, dagføringar og umbyggingar av bygningunum hjá sjúkrahúsverkinum næstu 15 árini.

Árliga viðlíkahaldið av bygningunum hjá Landssjúkrahúsinum verður mett til at kosta góðar 14 milliónir krónur. Sambært frágreiðingini, er eisini tørvur á 867 milliónum krónum til dagføringar av hølunum hjá Landssjúkrahúsinum.

Á Klaksvíkar sjúkrahúsi verður viðlíkahaldið av bygningunum mett til at kosta góðar 2,3 milliónir krónur um árið, umframt dagføringar fyri 122 milliónir krónur.

Árliga viðlíkahaldið á Suðuroyar sjúkrahúsi er mett til 2 milliónir krónur, og mælt verður til dagføringar á Suðuroyar sjúkrahúsi fyri góðar 33 milliónir krónur.

Metingin av kostnaðinum er gjørd við støði í tølum frá føroyskum og donskum kommunum. Tølini eru prístalsjavnað og lagt er upp fyri kostnaðarstøði í Føroyum, stendur í frágreiðingini.

Harafturat tekur metingin støði í aldri, nýtslu, góðsku, viðlíkahaldi og staðseting av bygningunum.