Miðflokkurin manglar tvær undirskriftir, fyri at útseta abortlógini

Tað fer neyvan at eydnast Miðflokkinum at steðga gildiskomuni av nýggju fosturtøkulógini. 

Tað skilst á Frihedsbrevet.fo, sum hevur tosað við Steffan Klein Poulsen, formann Miðfloksins.

Nýggja abortlógin er samtykt og kemur í gildi 1. juni 2026.

Men seinastu dagarnar hevur tað verið arbeitt fyri at útseta hesa dagfesting til 1. januar 2027 - altso í eitt hálvt ár.

- Tað er eingin loyna, at vit hava ætlað at gjørt okkurt beinanvegin. Men vit duga eisini at síggja, at tíðin er ov knøpp til at gera eitt broytingaruppskot ella leggja eina nýggja lóg fram. Tí skjóta vit upp at útseta gildiskomuna í eitt hálvt ár, sigur Steffan Klein Poulsen við Frihedsbrevet.fo.

Verður av ongum

Men samstundis ásannar hann, at tað eftir øllum at døma verður av ongum.

- Okkum mangla ikki nógvar undirskriftir, men eg trúgvi ikki, at vit fáa hetta fram, sigur nýggi formaðurin í Miðflokkinum.

Spurdur ítøkiliga, um tað er rætt skilt, at hann hevur 14 fólk við sær og harvið manglar tvey, játtar hann.

Hóast tað ikki eydnast at fáa útsett gildiskomuna, fer Steffan Klein Poulsen at arbeiða fyri at broyta fosturtøkulógina, og tað uppskotið kemur fyri í næstu tingsetu, sigur hann.