Eingin týsk stjórn

- Tað er betri ikki at stjórna landinum enn at stjórna illa, segði formaðurin í FDP, Christian Lindner, tá hann fór úr samráðingarhølinum.

Hann legði dent á, at tað ikki hevði borið til at fáa álit á Angelu Merkel, samveldiskanslara, og heldur ikki á Grøna flokkinum, sum eisini var við í samráðingunum.

Partarnir hava í meir enn ein mánað samráðst um nýggja stjórn í Týsklandi, sum er størsti búskapurin í Europa.

Samráðingarnar hava ført til ógvusligt stríð ímillum partarnar, og at enda vóru flokkarnir mestsum ósamdir um alt.

Serliga hevur ósemja verið um innflytarar.

Angela Merkel hevur ikki verið so nógv ímóti at fremmandafólk koma til landið, og tað hevur havt við sær, at yvir ein millión fólk eru komin til Týsklands síðani í 2015.

Tað hevur skapt misnøgd ímillum fólk, so flokkar á høgraveinginum hava fingið størri undirtøku.