Ófriður í Beirut

Samanbrestir hava verið millum mótmælisfólk og libansk trygdarherlið uttan fyri amerikansku sendistovuna í norðara parti av høvuðsstaðnum Beirut.

Mótmælini eru ímóti avgerðini hjá amerikanska forsetanum Donaldi Trump at viðurkenna Jerusalem sum høvuðsstað Ísraels.

Steinaðu og kyndu bál

Mótmælisfólkini steinaðu sendistovuna og kyndu bál á gøtuni uttanfyri. Trygdarherliðini brúktu táragass og vatnkanónir at spjaða mótmælisfólkið og settu upp vegforðingar uttan fyri sendistovuna.

Arabiska samgongan hevur á fundi fordømt amerikansku avgerðina at viðurkenna Jerusalem sum høvuðsstað Ísraels og sigur seg hava mist álitið á USA sum semingspartur fyri friði í Miðeystri.