Loysingarflokkar vinna valið

Hóast størsti einstaki flokkurin á valinum í Katalonia í dag er ein sambandsflokkur, so er tað loysingarflokkarnir, sum samanlagt hava fingið í øllum førum 70 av teimum 135 tingsessunum og harvið eisini parlamentariska meirilutan, sum teir eisini høvdu, áðrenn fólkaatkvøðuna og áðrenn spanska stjórnin sendi katalansku stjórnina. Til hús, í fongsul ella í útlegd. 

Skipa stjórn

Inés Arrimadas, forkvinna í størsta flokkinum, Ciutadans (CS) fer tó at royna at skipa samgongu. Flokkir hennara hevur fingið 25 prosent av øllum atkvøðunum, svarandi til 35 tingsessir. 

Borgarligi loysingarflokkurin hjá Carles Puigdemont, fyrrverandi forseta, sum er í útlegd í Belgia, Junts per Catalunya, ið merkir saman fyri Katalonia, gjørdist tann størsti av teimum trimum loysingarflokkunum við 34 tingmonnum. Tjóðveldisfylkingin ERC fekk 32 tingmenn, meðan triði loysingarflokkurin, CUP, ið er ein vinstrahallur anarkistiskur flokkur, fekk fýra tingfólk. 

Úrslitið av valinum fekk alt fyri eitt Carles Puigdemont, fyrrverandi forseta, at krevja, at frákoyrda og lógliga katalonska stjórnin verður innsett av nýggjum og at fongslaðu politikararnir verða leyslatnir alt fyri eitt. 

Rahoy stóri taparin

Stóri taparin er flokkurin hjá Mariano Rajoy, forsætisráðharra, Partido Popular, ella PP. Hann fekk einans fýra tingmenn í mun til 11 við seinasta val. 

Valluttøkan var methøg, yvir 80 prosent. 

Spurningurin er so, um tað fer at eydnast loysingarflokkunum at skipa eina samgongu. Sum skilst, eru spenningar millum JuntsxCatalunya og ERC. Og CUP fer ikki at góðtaka nakað annað enn loysing. 

Vert er at geva gætur, at hóast loysingarflokkarnir fingu ein meirluta av tingmonnunum í katalonska tinginum, so fingu teir undir 50 prosent av samlaðu atkvøðunum.