Eiturserfrøðingar til Bretlands

Serfrøðingar í felagsskapinum, sum virkar fyri at seta bann fyri eiturevnavápnum, OPCW, koma til Bretlands í dag at kanna royndir av eiturálopinum á fyrrverandi russiska njósnaran, Sergej Skripal, og dóttir hansara, Juliu, í bretska býnum, Salisbury, fyrr í hesum mánaðinum.

BBC sigur, at kanningin fer at taka í minsta lagi 14 dagar.

Bretski uttanríkisráðharrin segði í samrøðu við BBC í gjár, at Russland hevur ment og goymt nervaeitur av slagnum Novichok.

- Seinastu árini hava vit fingið prógv fyri, at Russland ikki bara hevur kannað møguleikarnar at lata nervaeitur í sambandi við atsóknir, men hevur eisini ment og goymt Novichok, segði Boris Johnson.

Hann segði hetta í einari viðmerking til russiska ES-sendiharan, Vladimir Chizhov, sum í somu sending tók uppaftur, at Russland hevði einki at gera við álopið í Salisbury. 

Vladimir Chizhov undraðist á, at bretskir myndugleikar so tíðliga eru komnir til ta niðurstøðu, at talan er um Novichok, og hann segði, at slóðir kunnu eltast til bretsku hernaðarstarvsstovuna Porton Down.

- Porton Down hevur mestan hernaðarútbúnað í øllum Bretlandi, og tey hava granskað í kemiskum vápnum. Og Porton Down er stutt frá Salisbury, legði russiski ES-sendiharrin afturat. 

Theresa May, forsætisráðharri, sigur, at tað er júst Porton Down, sum hevur eyðmerkt eiturevnini, sum vórðu nýtt í álopinum, og at tey hoyra til bólkin Novichok, sum sovjettiski herurin hevur ment, sigur Theresa May.