Skripal í bata

Læknar á Salisbury District Hospital siga í dag við BBC at fyrrverandi russiski njósnarin Sergei Skripal er skjótt við at koma fyri seg aftur.

66 ára gamli Sergei Skripal og 33 ára gamla dóttirin Yulia hava verið á sjúkrahúsi í meir enn ein mánaða eftir at tey vóru funnin við ongum viti á einum beinki í suðurenska býnum Salisbury 4. mars. Yulia Skripal kom skjótari fyri seg eftir álopið, men Sergei Skripal hevur verið í lívsvanda síðani álopið.

Hendingin hevur elvt til diplomatiska kreppu millum Russland og fleiri vestanlond.

Bretska stjórnin vil vera við, at Russland stendur aftanfyri eiturálopið, men russiska stjórnin avnoktar, at hon skal hava havt nakað við hendingina at gera.

Tilsamans 20 lond, teirra millum 18 evropeisk lond og USA og Kanada, hava víst russiskum sendifólkum út, eftir at bretland segði seg hava prógv fyri, at Russland hevði ábyrgdina av álopinum.