Leirdúgvukongar: Báðir meistararnir hava skotið betur fyrr

Báðir føroyameistararnir í skjóting um vikuskiftið hava skotið betur fyrr.

 - Tað er stórt at vera føroyameistari. Serstakliga tá tað gongur so illa innleiðandi, segði Esmar Joensen úr Byrsumúla.

 - Áðrenn kappingin byrjaði, hevði eg væntað tað (at vunnið, blaðm.), men sum kappingin leið, bleiv eg meir og meir nervøsur, tí tað gekk so illa, segði Tórur Fløtt úr Sunda Byrsufelag.

Felags fyri teir báðar var kortini, at teir fingu innstillað bæði siktið og høvdið, tá finaluumførini skuldu skjótast.

Esmar Joensen vann nevniliga OL-trap fyri aðru ferð, og Tórur Fløtt legði eitt føroyameistaraheiti afturat teimum mongu, sum hann hevur skotið seg til ígjøgnum 16 kappingarár.

Teir báðir vóru ávíkavist fimm og fýra stig frammanfyri nærmastu kappingarneytarnar Bartal Klettheyggj og Leiv Joensen.