Fíggjarnevndin viðger meirjáttanir fríggjadagin

Ikki fyrr enn fríggjadagin fer Fíggjarnevndin at viðgera fíggjarnevndarskjølini frá landsstýrinum.
Nevndin fekk skjølini mánadagin, men forkvinnan í nevndini, Ruth Vang, hevur verið uttanlands.  

Landssjúkrahúsið biður Fíggjarnevndina um tíggju milliónir krónur afturat alt fyri eitt.

Fram er komið, at Landsjúkrahúsið hevur brúk fyri 21 milliónum krónum fyri at fáa játtanina í ár at halda.

Nakað er funnið við sparingum, men enn vanta tíggju milliónir krónur, sum Fíggjarnevndin nú er biðin um.

Semingsstovnurin

Hitt fíggjarnevndarskjalið er um 300.000 kr. til Semingsstovnin, tí semingsmenninir hava so nógv at gera í ár.

Játtanin í ár er annars 400.000 kr.

Mælt verður til í fíggjarnevndarskjalinum, at tær 300.000 kr. verða tiknar frá Gjaldstovuni, sum tolir at missa pengarnar, tí tað dregur út at seta samskipara til Keypsportalin, sigur Fíggjarmálaráðið.

Formansskapurin í løgtinginum hevur fund í morgin um millum annað fíggjarætlanina hjá løgtinginum í 2019.