Undirsjóvartunlar lækka prísirnar fyri túrahald

Tað verður bíligari hjá persónbilum at koyra í undirsjóvartunlunum báðum frá 1. august. 

Nevndirnar í P/F Norðoyatunlinum og P/F Vágatunlinum hava avgjørt at lækka prísirnar fyri túrahald.

Prísurin fyri hvønn túrin við túrahaldi lækkar úr 25 krónum niður í 20 krónur, svarandi til eina lækking upp á 20 %.

Frá 1. august kostar 20-túrahald til persónbil 400 krónur, 40-túrahald ber til keypa fyri 800 krónur og 200 túrar fyri 4.000 krónur. 

Aðrar broytingar verða ikki í hesum umfarinum. 

Ferðslan í undirsjávartunlunum økist alsamt, siga partafeløgini. Fyrra hálvárið 2018 var vøksturin í báðum tunlum sjey prosent.

Við óbroyttum ferðslutølum hevði prísbroytingin kostað feløgunum knappar 3,3 millónir krónur í minni inntøku. 

Økist ferðslan tað sama í seinna hálvári sum í fyrra hálvárinum, vænta feløgini, at tað fer at kosta okkurt um eina millión krónur at lækka prísirnar.

Príslækkingin, sum nú er á veg, ger prísmunin størri millum túrahaldini og stakar túrar. 

Við túrahaldi kann ein persónbilur koyra fimm ferðir gjøgnum tunlarnar fyri tað sama, sum ein stakur túrur kostar.