Trý listafólk fingu listafólkaløn

Brandur Paturson fær fyri sítt arbeiði við myndlist, Búi Dam fyri leiklist og Katrin Ottarsdóttir fyri bókmentir.

Listafólklønin er ásett samsvarandi læraraløn fólkaskúlans á stigi 21.1, ið svarar til knappar 28.000 krónur um mánaðin. Endamálið er at bøta um korini hjá yrkislistafólkum.

40 umsóknir komu inn til tær tríggjar lønirnar, og fimm faknevndir vórðu settar at gera tilmæli til nevndina í Mentanargrunninum.

Listafólk kunnu ikki røkja annað fast starv, meðan tey fáa starvsløn, men tey kunnu hava inntøkur av teirra skapandi virksemi í 3-ára-skeiðnum.

Tað eru yrkislistafólk, sum kunnu søkja Mentanargrunnin um listafólkløn, og hetta er fyrstu ferð, at listafólkalønin verður latin.