Marine Harvest kann missa kilenskt aliloyvi

Myndugleikarnir í Kili hava í umbúna at revsa Marine Harvest hart, eftir at út við 700.000 laksar í summar sluppu leysir úr aliringum hjá felagnum í Punta Redonda, sum liggur í sunnara parti av landinum.

Sambært netmiðlinum E24 kann Marine Harvest rokna við at missa sítt aliloyvi í økinum og harumframt fáa upp til 8,2 milliónir dollarar, tað eru 54 milliónir krónur í okkara pengum, í bót.

Harumframt skal felagið rudda upp eftir sær.

Kilensku myndugleikarnir siga í síni niðurstøðu um óhappið í summar, at viðurskiftini í alibrúkinum vóru ikki í lagi, soleiðis at alast kann á tryggan hátt. Og tí slapp laksurin.

Higartil eru bara 5,5 prosent av teimum 700.000 laksunum fangaðir aftur.

Kilensku myndugleikarnir skíra óhappið at vera sera álvarsamt, og at tað í ringasta føri kann hava við sær óbótaligan skaða á umhvørvið.

Marine Harvest hevur fingið 15 dagar at gera sínar viðmerkingar til fyribils-niðurstøðuna frá kilensku myndugleikunum.