Trý tilboð til bussleiðina í Sunda kommunu

Trý tilboð komu inn at reka bussleiðina í Sunda kommunu næstu fimm árini. 

Tað sæst á heimasíðuni hjá Sunda kommunu.

Tilboðini at reka bussleiðina í Sunda kommunu vórðu upplatin á fundi á døgurða í gjár. Trý feløg bjóðaðu, tey vóru IR Lastbilar, HK Bussar og HZ Bussar. HZ Bussar áttu lægsta tilboðið.

Umsitingin í kommununi skal nú gera eina innstilling til trivnaðar nevndina, sum skal taka støðu til øll tilboðini og leggja eina tilráðing fyri fíggjarnevndina, sum so leggur málið fyri býráðið. 

Roknað verður við at málið verður avgreitt í november.

Tað var í fjør, at bussleiðin í Sunda kommunu gjørdist ókeypist at koyra við.

Higartil hevur hetta verið ein royndarverkætlan í eitt ár í senn, men nú er Bussleiðin boðin út í eitt fimm ára tíðarskeið.

Bussleiðin verður nógv brúkt, sigur Sunda kommuna. Í 2017 koyrdu tilsamans 5.604 ferðandi við bussleiðini. Og hagtølini fyri 2018 vísa nakað tað sama tal av ferðandi higartil í ár.