Umstríddur tunnil á skránni fyri tingfundin í dag

Tunnilin til Fámjins er á skránni fyri tingfundin í dag.

Uppskotið er óvanligt, tí Kristin Michelsen, sum er í tinginum fyri Javnaðarflokkin, hevur lagt uppskotið fram saman við øllum flokkunum í andstøðuni.

Uppskotið loyvir landsstýrismanninum í samferðslumálum at skipa fyri, at nýggjur tunnil og vegir verða gjørdir úr Øðravík til Fámjins.

Í uppskotinum stendur eisini, at verkætlanin kann í mesta lagi kosta 60 mió. kr.

Henrik Old gavst

Nú er meira enn mánaður síðani, at júst tunnilin til Fámjins gjørdi, at Henrik Old legði frá sær sum landsstýrismaður í samferðslumálum.

Henrik Old segði tá, at hann mátti ásanna, at hann ikki hevði politiska undirtøku fyri at gera tunnilin til Fámjins nú.

Síðani hevur Aksel V. Johannesen, løgmaður, umsitið samferðslumálini í landsstýrinum.

Eykajáttanin til Glasir er eisini á skránni í dag. 

Hon kom í løgtingið í gjár, men vikið er frá tíðarfreistunum, tí eykajáttanin, sum er 18,7 mió. kr., hevur skund.