- Mugu javnseta allar útleigarar

Privatir og vinnuligir útleigarar eiga at verða á jøvnum føti. 

Tí eigur skattafría markið upp á 150.000 krónur fyri langtíðarleigu eisini at verða galdandi fyri partafelag, og ikki bara privatpersónar.

Tað sigur Gordon Rajani, stjóri í Mark, sum hevur bygt íbúðir við Marknagilsvegin í Havn.

Avleiðingin av uppskotinum hjá Kristinu Háfoss, landsstýriskvinnu í fíggjarmálum, er, at vinnuligir útleigarar skulu kappast við privatar útleigarar, sum ikki rinda skatt.

Mark og onnur feløg kappast við kjallaraíbúðir og líknandi leigumál, og feløg, sum leiga íbúðir, kunnu ikki kappast við privatpersónar, sum fáa 150.000 kr. í leiguinntøku skattafrítt.

Er endamálið at fáa fleiri langtíðarleiguíbúðir, er einfalda loysnin at javnseta allar útleigarar, bæði privatar og vinnuligar, sigur Gordon Rajani.

Hann sigur, at verður uppskotið samtykt óbroytt, noyðist Mark at steðga verkætlanum, sum eru á veg, tí íløgurnar eru gjørdar undir skeivum fortreytum. 

Kristina Háfoss sigur í viðmerkingunum til uppskotið, at endamálið er at gera tað skattafrítt hjá smærri útleigarum at leiga út.

Markið upp á 150.000 krónur er ásett, so tað ikki skal verða skattafrítt hjá stórum vinnuligum útleigarum at leiga út, sigur landsstýriskvinnan í fíggjarmálum.

Hugsað verður serliga um at stimbra hugin at leiga kømur út, kjallarar ella tóm hús. 

Løgtingið viðgjørdi uppskotið hjá Kristinu Háfoss seinnapartin, og málið er nú farið í fíggjarnevndina.