Úr at gera av fullum fólkum

Tað merkist hjá løgregluni, at jólaborðhaldini eru byrjað. Løgreglan hevði í nátt og morgun úr at gera av fullum fólkum ymsastaðni í landinum, sigur vakthavandi á politistøðini í Havn.

Tað hevur verið rættiliga kalt í nátt, og tí hevur løgreglan tikið sær av fleiri fólkum, sum vóru dottin av í fyllskapi. Í tí eina førinum mátti eitt fólk koyrast til kanningar á Landssjúkrahúsinum.

Kanska eitt harðskapsmál

Boð vóru eisini eftir løgregluni tvær ferðir í nátt, tí fólk í Havn vóru farin til hendurs. Í tí eina førinum vóru tvær kvinnur farnar til hendurs - tað málið endar kanska sum eitt harðskapsmál hjá løgregluni.

Løgreglan varð í tveimum førum í nátt eisini boðsend til húsaófrið heima hjá fólki - einaferð í Havn og einaferð í Suðri. Ein bilførari varð klokkan 3:30 í morgun tikin á klaksvíksleiðini fyri at koyra ávirkaður.

Hóast tað var sera hált ymsastaðni í morgun, so hevði løgreglan ikki fingið nakra fráboðan um ferðsluóhapp. Onkur var kortini dottin í hálkuni, sigur John Martin Olsen, vakthavandi á politistøðini.