Nýtt búmerki til Sjóvar kommunu

Sjóvar kommuna hevur nú fingið nýtt búmerki.

Tað var í summar, at kommunan skrivaði út búmerkjakapping. Tá freistin at lata uppskot inn var farin, vóru 59 uppskot komin inn. Tað stendur at lesa á heimasíðuni hjá kommununi.

Leygardagin var so vinnarauppskotið avdúkað. Vinnarauppskotið átti KREA, og hevur Sjúrður Højgaard teknað nýggja búmerkið.

Vinnarin fekk handaðan kekk upp á 20.000 krónur, og Sjúrður Højgaard tók ímóti. 

Til avdúkingina helt Pole Hansen, varaborgarstjóri, røðu, og hann segði um vinnarauppskotið, at nýggja búmerkið hevur íblástur frá býlinginum við Sjógv, ið kommunan ber navnið á. 

Búmerkið lýsir eitt tað eyðkendasta staðið í Sjóvar kommunu, sum øll, ið hava verið har, leggja til merkis, og sum er eins og nalvin í býlinginum við Sjógv, og tí eisini í Sjóvar kommunu.