Kina verjir Huawei

Álopini sum seinastu tíðina hava verið ímóti kinesiska telefelagnum, Huawei, og øðrum kinesiskum fyritøkum, er bakbit og diskriminatión.

Tað sigur ES sendiharrin hjá Kina, Zhang Ming, við blaðið, Financial Timesa.

- At nógv lond vilja hava Huawei burtur frá at menna 5G-netið í fleiri londum, kann fáa álvarsligar fylgjur fyri búskaparliga og tekniska samstarvið í heiminum, sigur hann.

Í fleiri londum er ivi sáddur um Huawei, serliga eftir at myndugleikarnir í Kina broyttu viðurskiftini í 2017, so fyritøkur kunnu fáa boð um at reka fregnartænastuvirksemi fyri stjórnina.

Fleiri lond hava longu gjørt av, at Huawei ikki sleppur upp í part, nú 5G-netið skal mennast.

M.a. hevur bretska Vodafone, biðið um steðg í samráðingunum við Huawei um 5G netið í Bretlandi, meðan fleiri viðurskifti verða kannað. Stjórin í fyritøkuni, Nick Read, sigur, at Vodafone framvegs ynskir at keypa útgerð frá Huawei, men at ivi er sáddur um, hvørt tað er rætt at lata Huawei sleppa framat sjálvum heilanum í kervinum, og tí er steðgur í samráðingunum ímillum partarnar.

Vodafone ger íløgur fyri 7,5 milliardir evrur um árið, og nýtir útgerð frá Huawei í nøkrum førum, m.a. í Spania.

Australia og Ný Sæland hava boðað frá, at Huawei ikki sleppur at útbyggja 5G-netið í londunum, og USA hevur sett almennum myndugleikum forboð fyri at handla við Huawei og kinesiska kappingarfelagan hjá Huawei, ZTE.

5G-netið, sum tosað verður so nógv um, er ein yvirbygningur á 4G-netið, og er so framkomið, at tað m.a. skal nýtast til, at bilar koyra uttan førara, og at stórt sæð øll teknisk útgerð kring heimin skal virka, uttan at brotið verður av.

Tað er júst tað, sum myndugleikarnir í nógvum londum eru í iva um, tí tey meta ikki at trygdin er nóg góð, og eisini verður mett, at kinesisku myndugleikarnir kunnu nýta framkomnu útgerðina til njósning.