Skúlaferðslan á Glyvrum ein hurlivasi

Ferðslan við Glyvra skúla skal nú gerast tryggari.

Hon er komin í býráðíð í Runavík, sum í ár hevur sett av 250.000 kr. til ferðsluna við skúlan. 

Á býráðsfundinum herfyri samtykti býráðið einmælt, at tekniska deild hjá kommununi ger uppskot um eina loysn á ferðsluviðurskiftunum við Glyvra skúla.

Tá tað arbeiðið er liðugt, verður málið tikið upp til nýggja politiska viðgerð í býráðnum.

Eftir tað ber til at fara undir arbeiðið, í fyrstu atløgu fyri játtanina, 250.000 kr., sum longu er sett av til endamálið í hesum árinum.

Um átta-tíðina á morgni er støðan við Glyvra skúla tíðum ørkymlandi.

Har eru bussar, bilar, og skúlabørn til gongu ella á súkklu hvørt um annað við ein høvuðsveg, har sum nógv ferðsla er.