Vil hoyra bisp og Amnesty um kynsskifti

Rættarnevndin hjá løgtinginum er nú av álvara farin undir at viðgera lógaruppskotið hjá Sonju Jógvansdóttur um at broyta lógina um fólkayvirlit, so fólk kunnu skifta kyn løgfrøðiliga.

Nevndin hevur fund mikudagin í næstu viku, og tá er málið um løgfrøðiligt kynsskifti á skránni. 

Nevndin hevur sent boð eftir felagsskapinum LGBT, eftir einum privati persóni, sum tað stendur á heimasíðuni hjá Rættarnevndin, eftir Amnesty, Tórmóði Stórá, sálarlækna, Suna Poulsen, sálarfrøðingi, og Jógvani Fríðriksson, bispi, fyri at hoyra, hvat tey halda um løgfrøðiligt kynsskifti.

Uppskotið hjá Sonju Jógvansdóttur er gamalt. Hon legði tað fram 21.august í fjør. Fyrsta viðgerð var í tinginum 6.november.

Í viðmerkingunum til uppskotið vísir Sonja Jógvansdóttir á, at uppskotið heimilar, at fólk, hvørs lívfrøðiliga kyn er í andsøgn við kynssamleika teirra, við einari umsókn kunnu skifta kyn løgfrøðiliga. 

At skifta kyn løgfrøðiliga merkir, at søkt verður um P-tal, sum samsvarar við kynsliga samleikan.

Hetta gevur tvørkyndum møguleika at velja sær navn samsvarandi samleika sínum, fáa nýtt samleikaprógv, koyrikort og pass.