Nógvir rykkjarar einki svar enn

Hóast fleiri rykkjarar eru sendir, hevur Kommunala eftirlitið í Innlendismálaráðnum ikki fingið endaliga frágreiðing frá Klaksvíkar kommunu um Biskupstorg.

Men tilfarið er á veg, sigur Jógvan Skorheim, borgarstjóri í Klaksvíkar kommunu.

Klaksvíkar kommuna hevur avgjørt at brúka sjálvsognarstovnin undir Kráarbrekku at keypa handilshølini í veghæddini í Biskupstorgi, sum Bústaðir hava bygt.

Kommunan ætlar síðani at leiga handilshølini frá sjálvsognarstovninum undir Kráarbrekku og leiga tey útaftur.

Hetta vil Kommunala eftirlitið frætta meira um.

Gamalt mál

Málið er ikki nýtt. Tað byrjaði í november í fjør.

Men enn er tað ikki liðugt. 

Jógvan Skorheim sigur, at síðst í næstu viku verður okkurt nýtt at frætta.

30 íbúðir eru í Biskupstorgi. 

Leigararnir skuldu upprunaliga sleppa at flyta inn í fjør.

Men teir eru ikki slopnir inn enn, tí arbeiðið er ikki liðugt.