Fiskimannaskúli ikki á veg

Ein fiskimannaskúli er ikki á veg í Føroyum í løtuni.

Men landsstýriskvinnan ætlar at endurskoða hetta økið í næstum. 

Hanna Jensen, landsstýriskvinna í skúlamálum, hevur svarað sínum fyrsta grein 52a fyrispurningi.

Hann var frá Magnusi Rasmussen, løgtingsmanni.

Hann spurdi, um arbeitt verður við at fyrireika ein fiskimannaskúla í Føroyum.

Menna útbúgvingar

Hanna Jensen svarar, at arbeitt verður ikki við tí. 

Hon sigur tó, at átrokandi er at menna útbúgvingar til tørvin á arbeiðsmarknaðinum og serliga í høvuðsvinnu okkara, fiskivinnuni. 

Ætlanir eru um at byrja hesa menning saman við viðkomandi skúlum, stovnum, feløgum og vinnuni sum skjótast.

Hanna Jensen sigur, at fyri 12 árum síðani varð bjóðað út ein yrkisútbúgving í fiskireiðskapi.

Men áhugin var ikki stórur. Bara ein lærlingur fekk útbúgving eftir skipanini.