Keypti fyri Strandfaraskip landsins

Hósdagin í síðstu viku boðaðu Samferðslumálaráðið og Strandfaraskip landsins frá, at Alpha Pilot varð keyptur at sigla millum Gomlurætt og Hest.

Dagin eftir, fríggjadagin, boðaði skipakrásetingin frá, at smápartafelagið Faroe Maritime Management í Havn hevði keypt Alpha Pilot frá smápartafelagnum Búrhellu í Klaksvík.

Felagið í Havn stendur nú sum eigari í Teyggjuni.fo.

Men tað verður ikki leingi, sigur Hilmar Eliasen, stjóri á Strandfaraskipum landsins.  

Meklari

Strandferðslan hevur brúkt Faroe Maritime Management sum meklara, ella millumlið, í keypinum.

Sp/f Faroe Maritime Management keypti Alpha Pilot fyri 350.000 kr. Landið keypir hann fyri 400.000.

Alpha Pilot verður nú riggaður til at sigla fyri Strandfaraskip landsins. Hann skal millum annað málast bláur, so liturin verður tann sami sum onnur skip hjá stovninum hava.

Alpha Pilot, sum er bygdur í 1974, hevur øll loyvi, sum eru kravd, tá siglt verður við ferðafólki.

Alpha Pilot tekur 25 ferðafólk um summarið og 18 um veturin.